ИНЖЕНЕРЛІК БІЛІМ БЕРУДЕ ЭНДАУМЕНТ ҚОРЛАРЫН ПАЙДАЛАНУДЫҢ ӘЛЕМДІК ТӘЖІРИБЕСІ

Аңдатпа

Эндаумент-қорлар бүкіл әлем бойынша білім беру ұйымдарының тұрақты қаржылануын қамтамасыз етуде маңызды рөл атқарады. Қорлар жеке тұлғалар мен заңды тұлғалардың қайырымдылық салымдары есебінен қалыптасып, кейіннен білім беру бағдарламаларын қолдауға және дамытуға бағытталатын табыс алу мақсатында инвестицияланады. Инженерлік білім беру саласында эндаумент-қорлар қымбат ғылыми зерттеулерді, зертханалардың техникалық жабдықталуын қаржыландыруға және мамандарды даярлау сапасын жоғары деңгейде ұстап тұруға мүмкіндік беретін маңызды құрал ретінде көрінеді. Дүниежүзілік тәжірибе инженерлік білімді қолдауда эндаумент-қорларды пайдаланудың әртүрлі тәсілдерін көрсетеді, бұл ұлттық экономикалардың дамуына және университеттердің жаһандық деңгейдегі беделін арттыруға ықпал етеді. Осыған байланысты мақалада шетелдік елдердегі эндаумент қорларын қолдану тәжірибесі талданады.

Қазіргі таңда Қазақстанда жоғары білім беруді дамытудың маңызды аспектісі ретінде эндаумент-қорлар арқылы жүзеге асырылатын қаржыландыру танылады. Мұндай қорлар жеке және заңды тұлғалардың ерікті салымдарына арналған тиімді әрі ашық жүйе құрып, жоғары оқу орындарының кіріс базасын кеңейтіп, олардың қаржылық тұрақтылығын арттыруға бағытталған.

Мақалада эндаумент қаржыландыруының даму үрдістерін бағалау үшін ғылыми жарияланымдар мен материалдар талданып, жоғары білім беру жүйесіндегі эндаумент-қорлар жайлы түсінікті кеңейтуге, олардың қалыптасу әдістері мен инженерлік жоғары оқу орындарындағы қызмет ету тетіктерін зерттеуге жол ашады.