ШЫҒЫС ҚАЗАҚСТАНДАҒЫ БАЛАЖАЛ КЕН ОРНЫ АЛТЫН КЕНДЕНУІНІҢ МИНЕРАЛОГИЯСЫ ЖӘНЕ ТІК ЗОНАЛЫЛЫҒЫ

Аңдатпа

Балажал алтын кен орны Шығыс Қазақстандағы Батыс Қалба алтынды белдеуі шегінде орналасқан және негізінен дифференциацияланған габбро-диорит–диорит интрузивімен байланысты. Осы зерттеуде таужыныстардың гидротермалдық өзгерістері, кендердің минералогиялық құрамы, саф алтынның кездесу формалары және кенденудің құрылымдық позициясы арасындағы өзара байланыстар қарастырылады. Зерттеу геологиялық бақылауларға, петрографиялық және минераграфиялық зерттеулерге, сондай-ақ SEM–EDS әдісімен жүргізілген зерттеулерге негізделген.

Алтын кенденуінің екі негізгі типі ажыратылды: кварц-желілі және березиттенген интрузивтік таужыныстарда локализацияланған желіше-сеппелі алтын-сульфидті кендену. Негізгі сульфидті минералдар — пирит пен арсенопирит. Березиттенген таужыныстардағы ұсақ түйірлі алтын негізінен пирит және арсенопиритпен ассоциацияда кездеседі, ал ірірек саф алтын көбінесе кварц желілеріне және кейінгі кварц-карбонатты минералдық ассоциацияларға тән.

Гидротермалдық минерал түзілуінің бірізді төрт сатысы анықталды: ерте березиттену мен пирит-арсенопиритті минералданудан кварц-полиметалды және кейінгі кварц-карбонатты минералдануға дейін. Кендену типтерінің таралуы құрылымдық деңгейге байланысты да өзгереді: кен орнының жоғарғы бөлігінде кварц желілері басым болса, тереңдеген сайын қалыңдығы жоғары желіше-сеппелі пирит-арсенопиритті минералдану аймақтарының рөлі артады. Бұл ерекшеліктер Балажал кен орнының терең горизонттарында іздеу-барлау жұмыстарын жүргізу кезінде ескерілуі тиіс.